Estudioan: Oxida, Lee Kore eta Herra

Gaur egun, abestiak grabatzeko modu desberdinak erabiltzen dituzte taldeek: estudio profesionalak, etxeko estudioak eta estudio mugikorrak. Bakoitzeko bat topatuko duzue jarraian.

Gipuzkoako Oxida death'n'roll banda iraupen luzeko lehen diskoa borobiltzen ari da. Bateria, baxua eta gitarrak Tristan Iñiguezekin grabatu dituzte haren Bergarako Auryn Studios-etan. Ahotsak, berriz, Igor Sanchezekin bere etxeko Ebola Room estudioan. Laukoteak iragarri duenez, kolaborazio batzuk eta konponketa batzuk falta dira prozesua bukatzeko.

Oñatiko Lee Kore hardcore/metal taldeak lan berria grabatzeari ekin dio. Zumaiako Ozen estudiora bueltatu dira, Hoben bandarekin konpartitu zuten Antifa hardcore diskoa leku berean grabatu ostean. Zazpi abestiko lana izango da, eta aurrerago emango dituzte xehetasun gehiago.

Arabako Herra metalcore bandak formula errepikatu du, eta beste bi abesti grabatu ditu entsegu lokalean. Beste behin ere, Marco Papiz ekoizle argentinarrarekin. Datorren urtean plazaratzeko asmoa dute, bakoitza bideoklip batekin.