Ozki zuri-beltzetik itzartu da 'Zaila' pieza luzearekin

Goierriko Ozki kide bakarreko doom/sludge metal bandak urtebete luze zeraman doinu propiorik erakutsi gabe. Ordea, isilunea hamar minutuko Zaila abesti berriarekin hautsi du.

Aurkezteko hitz hauek erabili ditu: "Bizitza gaitz bezala ulertuta, denborak sortzen duen beldurra. Unibertsoaren handitasunaren aurrean, hutsalkeria, ezereza gara, eta gizakia bere tokia bilatzeko borroka etengabean tematzen da, koldar, izatearen zamari aurre eginez".

Gainerako kantak egitasmoaren Bandcamp atarian entzun daitezke.

Gorrototik eta nazkatik sorturiko egitasmoa da Ozki: "Ozki 2020ko udan hasi nuen. Musikarekin esperimentatu nahi nuen, jotzen 'ikasi'. Eskuartean nituen instrumentuak hartu eta abestiak sortzen hasi nintzen. Denborarekin, jotzeko eta grabatzeko teknika apur bat hobetu dut. Muturreko metala da nire erreferentzia, eta black metalarekin, death metalarekin, grindcorearekin... jolastu eta gero, doom, drone eta sludgearen bidea hartu dut. Etxeko estudioan grabatu dut guztia. Nihilismoa, negatibismoa, gizartearen ustelkeria... dira nire inspirazio iturriak".